Роберто Карлос ислам дінін қабылдағаны туралы ақпаратты жоққа шығарды

Бұған дейін БАҚ-та 53 жастағы бразилиялық футболшы шейх Джихад Хаммадехпен кездесу кезінде шахада айтып, ислам дінін қабылдағаны туралы ақпарат тараған еді. Алайда Карлостың өзі бұл мәліметтің шындыққа жанаспайтынын мәлімдеді.

«Мен ислам дініне үлкен құрметпен қараймын. Жұбайымның намаз оқығанын көргеніме қуаныштымын. Алайда менің исламды қабылдағаным туралы ақпарат шындыққа сәйкес келмейді», - деп келтіреді экс-футболшының сөзін Okaz басылымы.

Карлос үйлену тойындағы діни рәсімдер туралы да айтып өтті. Оның сөзінше, салтанатты шара барысында оның отбасының католиктік дәстүрлері де, жұбайы мен оның жақындарының діни ұстанымдары да ескерілген.

Бразилиялықтың дінін ауыстырғаны туралы ақпарат Түркиядағы билеуші Әділет және даму партиясының депутаты Али Шахиннің мәлімдемесінен кейін тарады. Саясаткер Бразилиядағы мұсылман қауымының өкілдерімен кездескенін айтып, шейх Джихад Хаммадехтің сөзіне сілтеме жасады.

Шахиннің айтуынша, Роберто Карлос біраз уақыт бойы шейхпен байланыста болған, кейін онымен жеке кездескен. Депутат дәл сол кездесуде бұрынғы футболшы шахада айтып, ислам дінін қабылдағанын мәлімдеген еді.

«Шейх Джихад Хаммадах маған Роберто Карлостың онымен ұзақ уақыт байланыста болғанын, ал шамамен төрт апта бұрын кездесуге келіп, шахада айтып, ислам дінін қабылдағанын жеткізді. Роберто Карлос пен оның отбасына бейбітшілік, денсаулық және амандық тілеймін», - деп жазды Али Шахин.

Алайда Роберто Карлостың өзі бұл ақпаратты жоққа шығарып, исламға құрметпен қарайтынын, бірақ дінін өзгертпегенін атап өтті.

Роберто Карлос футбол тарихындағы ең үздік сол қаптал қорғаушыларының бірі саналады. Бразилиялық мансабының ең жарқын кезеңін мадридтік «Реалда» өткізіп, клубпен бірге төрт рет Испания чемпионы атанды және үш мәрте Чемпиондар лигасын жеңіп алды. Бразилия құрамасымен 2002 жылы әлем чемпионы болды.

Карлос мансабында Түркияда да өнер көрсеткен. Ол 2007–2009 жылдары «Фенербахче» сапында ойнады.

21+, «Domina Fortuna (Домина Фортуна)» ЖШС Қазақстан Республикасының Мәдениет және спорт министрлігінің Туризм индустриясы комитеті» РММ 31.08.2021 жылы берген № 21025302 лицензиясы негізінде әрекет етеді.